Хемиска индустрија и пластика

Тука сè е прашање на шаржата. ISO 9001 во хемиски погон значи контролирана рецептура и евиденција на шаржата — која суровина, од која испорака, во која количина — контрола на влезната суровина и можност производот да се повлече од пазарот ако нешто тргне наопаку. За козметиката тоа не е препорака туку очекување на пазарот: ISO 22716 е добра производствена пракса за козметика, со барања за просторот, опремата, персоналот, контролата на шаржата и постапувањето со рекламациите. Кој произведува амбалажа што доаѓа во допир со храна, оди чекор понатаму — FSSC 22000 има опфат токму за производство на амбалажа и го бараат производителите на храна од своите добавувачи.

Вториот дел е она што излегува од погонот и она што влегува во работникот. ISO 14001 ги покрива емисиите, отпадните води, опасниот отпад и складирањето хемикалии; ISO 45001 изложеноста на хемикалии, истурањата, експлозивните атмосфери и личната заштитна опрема. ISO 50001 брзо се исплатува, бидејќи екструдерите, машините за бризгање и компресорите се меѓу најголемите потрошувачи на струја во индустријата. А кога купувач од ЕУ ќе побара податоци за јаглеродниот отпечаток, тука е ISO 14064 за пресметка на емисиите — како и безбедносните листови и класификацијата според CLP, без кои извозот во ЕУ не поминува.